Habelos, hainos. Detección remota de indicios arqueolóxicos mediante fotografía aérea e Lidar en Galicia

Varios factores explican que a chamada “arqueoloxía aérea” (a detección de elementos arqueolóxicos mediante fotografía aérea e medios semellantes) teña tido moi pouco desenvolvemento en Galicia. Porén, a crecente dispoñibilidade de fontes de información de acceso público (ortofotografías, imaxes de satélite, dados Lidar) está a mudar este panorama. Neste artigo repasamos eses factores e presentamos os múltiples indicios de novos elementos arqueolóxicos, non visibles en superficie, que foron identificados nun recente traballo na contorna dun amplo conxunto de castros nas provincias de A Coruña e Lugo. Entre os máis de mil elementos identificados hai posibles estruturas soterradas na contorna dos castros (foxos, posibles camiños, restos de parcelas...), trazas de partes dos sistemas defensivos hoxe desaparecidas e mesmo un par de ducias de posibles novos castros. Todos estes achados, que foron feitos de forma inicialmente casual, no marco doutra investigación, e usando só datos públicos de propósito xeral, xustifican a potencialidade de desenvolver proxectos nesta dirección mediante o uso de plataformas, sensores e planificacións de toma de imaxes especificamente deseñados coa finalidade de documentar elementos arqueolóxicos.

Arqueoloxía aérea. Fotografía aérea. Lidar. Castros. Idade do Ferro. Galicia.